去昂坪拍子女教育節目 馬時亨區瑞強搭纜車傾教仔
Kelly昨天登山去賞春天景色，搭昂坪360纜車，點知俾小妹見到港鐵主席馬時亨同歌星區瑞強齊齊搭一部纜車，呢個組合好新奇，小妹當然唔會放過呢個機會，一於跟隨兩人去昂坪睇吓做乜，見到佢哋拍緊一個關於子女教育嘅電視節目，期間兩人不時唱歌仔又大談教仔心得！
為咗拍攝呢個電視節目，馬時亨同區瑞強齊齊現身昂坪360纜車之上，馬時亨負責訪問區瑞強嘅教仔之道，區瑞強話口依家好多家長對子女有太高期望，要求佢哋跟住父母嘅步伐走，扼殺小朋友本身嘅興趣，令到小朋友好大壓力，小妹覺得講得有道理。
馬時亨問區瑞強實際教仔方法，佢就話自己有兩個細路，不過從來唔會迫小朋友做自己唔鍾意嘅事，之後又問，會唔會想兩個細路好似自己咁入行做歌手，區瑞強就回答佢哋自己鍾意先入行啦，讓由佢哋發展自己嘅興趣，先至最重要。
除咗傾教仔經，二人喺纜車上彈結他唱歌，區瑞強唱出Peter Paul and Mary嘅經典名曲 《Carry On Till Tomorrow》，佢覺得呢首歌好勵志，好適合用嚟鼓勵口依家嘅年輕人。纜車上唱唔夠，就到纜車站廣場，同遊客一齊Jam歌！成班人又跳又唱，搞到啲外國遊客同小朋友鬼咁開心。
